دمعة عصام ملكي على صديقه بطرس عنداري

الى روح الصديق بطرس عنداري

الله معك «يا بطرس» الجذابَّ
ما في حدا عا سمعتك غبرَّ
لساعة رحيلك ما حسبنا حساب
كنت العظيم ونكهتك عنبر

مشيت باصاله ورافقك اعجاب
وكسر الصداقه عندك تجبرَّ
ولما بجهادك مستحيل انجاب
صرت بعيون المجتمع تكبر

عندك كلام الجوهري مزراب
الله بيقولو عنك واكبر
فصَّل خيالك للحروف تياب
وموضه لكل مناسبه دبرَّ

مين البصدرو ما فتحلك باب
بابرة زمانك خيطك تعبرَّ
بتنشف دموع الاهل والاحباب
ومش رح بتنشف دمعة المنبر

«يابو زياد» ويا ابو الاخلاق
بلا دق كنت على القلوب تفوت
وكنت الصحافي البارع السبَّاق
وجرِّت قلامك للجرايد قوت

إخوي الك نحنا «ما كنَّا رفاق»
عملنا التفاهم بيننا لاهوت
وكنَّا تا حتى نقشعك نشتاق
وهلق ما فينا نقشعك تا نموت

يا بطرس الراَّيح عا تاني كون
وتارك وراك بها الدني حكايه
بالدور بيروحو البشر من هون
وعا الدرب نحنا دورنا جايي

بقدم تعازي لأَم زياد وللولاد
ولقرايبينك كل ساعه وكل حين
يا رفيقنا ويا خيننا ويا بو زياد
انشلله فدا بتكون عنا اجمعين