ـ1ـ
يا بو زياد غصّ القلم بكيو الحروف
وكل الجرايد بالدموع معنوني
هاك القلم ها الكان يتحدّى السيوف
تحني السيوف رقابها وما ينحني
يا صخرة الكلمه.. يا بو قلب العطوف
مجد الصحافه ع كتافك منبني
كنت ملوى هالدني بكل الظروف
من بعد منك فاضيه كل الدني
ـ2ـ
يا بو زياد.. دمعي غلي قلبي التهب
وما بكيت لو ما يكون بيفيد البكي
الموت سرّاق البشر.. نصي نهب
نصّي انسرق ع مين بدي ارتكي
مهما يكون شاعر قدير ومنوهب
شو ما حكي ما بينوفى حق الذكي
خايف إذا بغطّس كلامي بالدهب
يقولو لبطرس ما بيلبق هالحكي
ـ3ـ
أيا حكي بيلبق لبطرس يا ترى
شو ما انحكى فيها القضيّه مخاطره
كنت بالدمعات بدي اكتفي
الدمعات أكتر عن جروحي معبره
شو بخبرك يا رفيق ايامي الوفي
دشرت ايامي وراق مبعثره
يا طيب القلب ورقيق العاطفه
دشرت ايامي وراق مبعثره
يا طيب القلب ورقيق العاطفه
حتى على الناس القلوبا محجره
عنيسألو عن موقفي وشو موقفي
واقف كأني خيال من دون مقدره
ما بصدق القالو جفن بطرس غفي
قبل الوعي بطرس على الدنيا وعي
ولولا غفي بتضل عينو ساهره
ـ4ـ
قربت للتاريخ.. قلّي إنت مين
من بعد ما عكّز ع حالو واستراح
قلت بدّي منك خبار السنين
ل خبّيتها بعبّك من جنون الرياح
قلّي عن خبار السنين الماضيين
بطرس بإيدو غبرة الايام زاح
فلفش وراق مشلّعه وبطرس أمين
كل هالأخبار غيّبهن وراح
ـ5ـ
أصحابك الغطّو الشمس: بس الظلام
ما غطّ: ضل النور مرفوع اللوى
كل أصحابك من رجال العظام
حتّى ما يفرق مستوى عن مستوى
ودّو لجاد الحاج ولأسعد سلام
قولولهن هاك النسر جنحو هوى
وطوني مارون وجان مرمى للسهام
من بعد منك بس يجمعنا الزمان
بنحكي سوى بنحزن سوى بنبكي سوى
ـ6ـ
يا أم زياد قلبك تعذّب وانظلم
وصّل أنين جوارحك لجوارحي
خسرتي الحلم والجاليه خسرت علم
ولبنان خسران البلاغه والوحي
اعتادت حنان لبيّها تقلّو: نعم
ويقلّها: مني اطلبي ولا تستحي
اعترضت ع حكم الموت وقت اللي حكم
تراجع ولولا شوي قلاّ بتربحي
يا زياد ضبّ الجرح خبّي الألم
وقلّو لعماد كبّش بريش جوانحي
بو زياد تاركلكن خزنة قيم
تا ينمحي عمر الزمان بتنمحي
0 comments:
إرسال تعليق