يا روح بطرس/ فؤاد نعمان الخوري

قولو ل قمر نوّار: سرّب يا قمر
سافر رفيق الليل وانشلّ السهر
ويا بحر سدني لا بقا تعزم حدا:
في عمر ابيض متل القزاز انكسر...
في صوت دافي ضاع ب حراش الصّدى
انبحّ الحكي والشعر ب النصّ انشعر...
لمّا خبر بطرس رجع ل المبتدى،
اندلقت قناني الحبر ع كتاب السفر!
قولو ل عنب متريت: لا تعصر سدى
نشّف نبيد العيد والقلب انعصر؛
وخلّي الشجر يفلش غصونو ع المدى:
بركي مرق بطرس ع فيّات الشجر...
بطرس..الطير ل من وجع شعبو شدا،
بطرس..الكتف الحامل هموم البشر
هونيك ليله مزّ كاسو ع الهدا
ومن دون كلمة آخ او لفتة وداع
طارت النغمه ويبست عروق الوتر!
+++++

تركت الوطن من أربعه وعشرين عام
تا سجّل ولادي ب مدرسة السلام..
بطرس فتح لي باب قلبو و"النهار"
وكانت الغربه برد، وكفوفو حرام...
شفت الحنان مغلّف ب قشرة وقار
لقيت الطراوه تاكيه ع الالتزام
ولمّا نده لبنان من قلب الدمار
ندرنا ل تيّار الوعي زيت القلام!
...ودار الزمان وبطرس ولا يوم دار
ونامو السهارى وبطرس ولا ليل نام
ب عزّ العداوه يشقّ شبّاك الحوار
ويفرّق الطيبه ع اهل الانقسام...
وينك يا بطرس؟ ها الربيع بلا خضار
وينك يا بطرس؟ وطيت سطوح الكلام..
ردلّنا غضبة "نهارك" شي نهار
تا نكنّس الغبره عن قبور الرخام...
من أربعه وعشرين شرّدني الحصار
وهلّق غيابك شرّد رفوف الحمام!
يا رفيق قولك ها الدني غيمة غبار؟
يمّا الحياة بنام عينو مفتّحه
واليوم انت وعيت من بصر البنام؟
+++++

يا عيون لميا صورتو لا تضيّعي!
وخلّي حنان تزيّح الصوره معي...
وخبّو الحكايه يا زياد ويا عماد
ل ولادكم، ميراث اخلاق ووعي...
وكوني يا لميا عين بطرس ع الولاد
ب عينو اقشعي، وعينو ب الولاد اقشعي
ولفّي يا متريت القصايد ب الرماد:
ما عاد فيكي نقد بطرس تسمعي!
ويا ها الجرايد بيّضي حروف السّواد
لمّا اسم بطرس عبكرا بتطبعي
شيخ الصحافه ما بيلبق لو الحداد
وضلّي اشربي من جرّتو تا تشبعي!
يا روح بطرس كلّما تطلّ العياد
طلّي علينا وعايدينا وارجعي...
وروحي ع عرس الصّيف في هاك البلاد
في سنديانه ناطره رجوع الطيور
قولي لها: صوب النجوم تطلّعي!
++++++