جوقة المسرح الزجلية تودع الجالية بأشعار رائعة

أحيت جوقة المسرح الزجلية حفلتها الوداعية في مطعم وادي العرايش بحضور جمهور غفير من محبي الزجل اللبناني، وقد حلّق الشعراء الضيوف أنطوان سعادة والياس خليل وبسّام حرب كعادتهم مما ألهب الأكف وأتعب الحناجر من صيحات الاعجاب المفرح.

 سعادة وخليل وحرب ودعوا الجالية ولكن الجالية أبت أن تودعهم، فلقد زرعوا في غربتها الفرح المغلف بأبيات شعرية هادفة أرجعتنا الى وطن الأرز لبنان وكأننا في حلم جميل.

وكي لا يكون الوداع عادياً، بل على مستوى الشعر، زيّنت قصائد شعراء المهجر عصام ملكي وجورج منصور وحنا الشالوحي وطوني النسر حنا الحفلة. وها نحن ننشر ما وصلنا منها:

قصيدة عصام ملكي

يا  حاضرين بدون خود وهات
عندي عشر كلمات بالمونه
عليكم ما بدي اطرح سلامات
ضربتن قبل ما اوصل لهوني

يا انطوان وحق مار مارون
بذوق ومحبه ومقدره معجون
اللي بتشلحو عا الارض منلمو
وما في طلب عم ينفتح تمو
الا والو غبين عم بتكون

ويا الياس يا جبلة وفا واحساس
بصنين قمه في الك وبفاس
مطرح الك بقلوبنا عملنا
مش بس انك للاكل قلنا
بالكاس فينا نشربك يا الياس

وبسام من امرك صرت محتار
وللحل عندي ما التقى دبار
ما بقيت رح عدك ابن خيي
خف النظر بخراج عينيي
كلما التقينا بحسّبك ادوار

منـّا سرقتو قلوبنا بغفله
بدقة المعنى وروعة القفله
ما في حدا باخلاصكم ما حس
مش متل هلي بيعرفونا بس
وقت اللي بدهم يعملو حفله

لا تحّسبوني كلمتي محّرف
الجمهور كلو فيكم تشرّف
لبنان حامل هم عا كتافو
عندو من اللي حالهم شافو
واحد عجيبه واحد معجرف

العا منبرو بيبقى فرد شقفه
لا عيدها استاهل ولا الزقفه
ما في جزر ينقال عنو مدّ
ومش كل شاعر شاعر بينعدّ
ومش كل وقفه اسمها وقفه

واستاذ منو بمنطق الجدي
الحامل شهاده بضربة مهدّه
ومش بس وحدو التيس عندو قرون
ومنو صحافي عندنا البيكون
ما بيعرف الشده من المدّه

انتو عطيتو للشعر روحو
وبالاهتمام بتقطبو جروحو
بدكم تروحو عا الوطن لبنان
بس بصراحه بقول يا اخوان
من البال مش رح تقدرو تروحو

**

قصيدة طوني النسر حنا

للشعر انتو اليوم لاهوتو
حلو النسر يطلع من سكوتو
ممنوع انو تستحو منا
يونان عنا بينبلع حوتو

وحياتكم الكم اماكننا
والشعر الكم قدم بيوتو
واحباب الكم بعدنا وكنا
يا عاطيين الشعر جبروتو

هاجس الشوفه صار ساكننا
منكم اخد تفكيرنا قوتو
ساعة ما بدكم شرفو لعنا
باهلا ويا سهلا منفرش الطرقات
ومنقلكم عا قلوبنا فوتو

يا رفاقنا الشعار يا محبين
برجوعكم قولو عن لساني
بيجوز بالالفين وتلاتين
ارجع تا حتى زور لبناني

**

قصيدة جورج منصور

مرقو على سدني متل رف الطيور
والطير وجو خير موالو طري
طيور الشعر دقو عا اوتار الشعور
وما داعب الاوتار الا العبقري

الشاعر غيور كتير والسامع غيور
ما فيك ادن السامع تقلا اصبري
الادن الذكيه ما بتسمع للقشور
بتسمع رنين الدر لما بيندري

وجوقة المسرح ليلها فسحات نور
كلما عزمها المنبر وقلا اسهري
بتغازل النجمات بتحاكي البدور
وبيدق معها الدف نجم المشتري

صابر كنت تا نلتقي وقلبي الصبور
وحدو اشتلق عا قصتي ووحدو دري
ضيعت خشبة منبري خلف العصور
وغمّضت عيني بعد ما الدف انفخت
فتحت عيني لقيت خشبة منبري

الشاعر غريب بغربتو لا تحرجو
كلما التقى بشاعر بيهطل مدمعو
ولما بيشكي من الوجع لا تعالجو
ما بيوجعو جسمو زمانو بيوجعو

احبابنا وشعارنا ما تحججو
انو البعد للشعر جفف منبعو
كل شاعر الف ضحكه عا وجو
غنى كأنو الارز بدو يسمعو

واليوم همو عا الرجوع وروجو
وتا يرجع المشتاق شو النا معو
ما كنت من لبنان قلتلن يجو
لو كان عندي علم بدهم يرجعو

قالو الزجل متراجع ووضعو خطير
قلنالهم في خوف يعني عا المصير
لبنان هوّي والزجل قضّو كتير
غنو سوا شربو سوا الكاس المرير
ان ضل في لبنان جوقه للزجل
بتضل يا لبنان لبنان الكبير

**