قصيدة فؤاد نعمان الخوري في حفل تكريم الشاعر الراحل ادوار حرب

ما زال صوتك فرحة الوديان،
ما زال موّالك قصب رعيان،
ما زال كفّك بيدر الألوان،
ما زال دفّك عابق وعرقان...
ما زال اسمك في حمى الرهبان
... عبسة الكفر وبسمة الايمان..
ما زال عا شعرك غفي لبنان
ولمّا وعي، كان الورد بستان؛
ما زال وجهك قونة الوجدان،
وما زال ابنك دهّب العنوان:
طيّب انت..والموت يا ادوار
كذبه ب أوّل يوم من نيسان!
+++++

ونيسان عمرك: زهر وعصافير!
بس الزهر عمرو قصير كتير؛
ومشوار طير التلج، مهما طال،
لما التلج بيدوب، بدّو يطير...
يا حابس العصفور بالتمثال،
يا معلّب الزهره ببيت زغير:
دخلك ما بدّي تحجّر الموّال،
دخلك ما بدّي تحنّط التصوير!
ادوار...غيمه هاشله ع جبال،
ادوار.. نجمه سرّبت بكّير:
ادوار...مشوار وطلع ع البال،
كاس الوفا، يا رفيق المشاوير!
+++++

عا بيت ماري ماكيلوب جينا،
ومار شربل بينزل يلاقينا،
وبيضمّنا بغنباز ليل ونور،
ومن جرّة المدبح بيسقينا...
وبيقلّنا: خلّو الشعر مزمور
ع الشاعر الأكبر يوعّينا؛
المدبح او المسرح..صلا وندور
ورتة الطيبه من اهالينا...
المدبح او المسرح.. عطر بخور
والجمر يكوينا ويشفينا؛
والشعر ترتيلة قلب مهجور،
مش عبقر وشيطان غاوينا...
والّلي ب "عنّايا" زرع بالبور
متل ل زرع نغمه بليالينا؛
القدّيس والشاعر... عصا الناطور
من رهجة العالم بتحمينا،
وطهر الزجل بقلوبنا محفور،
من هيك جينا، وخلف سبع بحور،
متل الوطن عاش الزجل فينا!
+++++

والأربعه وعشرين عدّ سنين:
متل الدقيقه، الأربعه وعشرين!
سعاده وخليل وتحفتك بسّام
متلك لذات العيد مندورين!
يللاّ سوا نسترجع الايام:
ونقشع صبي عم يلعب ب"شاتين"،
ويكبر، وتكبر زهوة الأحلام،
وقصايدو تسهر ب "تنورين"...
ويكبر بعد..وترفرف الأعلام
عا صوت دافي مطعّم بنسرين!
ادوار... عين الحبّ ما بتنام،
ونحنا معك ع العمر سهرانين!

سيدني – أوّل نيسان 2013