سافر ولد بعدن طرايا جوانحو
ومدبّغه تيابو بحبر المدرسه
ودشّر بلابل ضيعتو عم يصدحو
وضلّت «ببشمزين» روحو مهودسي
ملامح الكوره مبيّنه عا ملامحو
ما لان قدّام الهجر كل شي قسي
ونسيو اللغه اللي تعلّمو صرف ونحو
لكن «عزيز» الكان لبناني اصيل
حرف من لغة بلادو ما نسي
ولما «عزيز» مشوار ايامو اختصر
الرحله القصيره ما حسبنا حسابها
وعا ارض «بشمزين» لم راح الخبر
خيّم سكون الليل فوق بوابها
الكوره بلد بتسلّم لحكم القدر
وسهم القدر صاب الجميع وصابها
وكلما غصن زيتون بالكوره انكسر
الارض الحنونه بتغمرو بعبابها
ويا «عزيز» غصة فراقك عم تزيد
عا قلوب اهلك واكتفو بحمل الشموع
«عصام» شِعرو بمأتمك نصّو نهيد
ونصّو جمر شعلان جوّات الضلوع
من اربعين نهار للخي البعيد
مستفقد وما طل طيفك عا الربوع
كل طالع شمس ينظملك قصيد
وكل غيبة شمس يغرق بالدموع
ظروف العمر وقت اللي عنّا بيعدوك
دقات قلبك «يا عزيز» توقفّو
وبالاربعين كتار هلي استفقدوك
تا يساعدو بحمل المصيبه تكاتفو
كلما الرجوله يذكرو عم يذكروك
عرفوك منّك من جماعه تزيّفو
اللي بيعرفو خيّك «عصام» بيعرفوك
وخيك «عصام» الناس كلاّ بتعرفو
0 comments:
إرسال تعليق